يا حروب

يا حروب لا تدوري حوالينا

حاجي بيكفي تهجمي علينا

ما عاد عنّا قلوب تحمل همّ

ولا عاد فيها دموع عينينا

*   *   *   *  *

عم تعصفي وجنون فيكي العصفْ

وعم تقصفي عمر الخليقه قصفْ

وقدَّيشها صعبه بيوم القصفْ

نلملم ضحايانا بـ إيدينا

وأطفال يبكوا من أذى التهجيرْ

وبلدان منّك صابها التدمير

وفقر ومجاعه بقهر وبتعتيرْ

حتّى العدم معّو تساوينا

مأساة كلّ بتمرقي مأساة

يا مصدر الآخات والويلاتْ

بدنا عليكي نصبّ هاللعناتْ

ع قد ما منّك تأذّينا

*   *   *   *  *

ما بين جوّ وبين بحر وبرّ

وين ما تحلّي عم يحلّ الشرّ

ومعاركك ما بين كرّ وفرّ

من جنونها خوتنا وجنّينا

نحنا البشر كلّ ما جنونك هبّ

منركع نصلّي ونحتمي بالربّ

تا نحوّلك واحات أمن وحبّ

قدّيش ما ركعنا وصلّينا

*   *   *   *  *

يا حروب يا آلات حربيّه

يا قاسيه وكتير مئذيّه

كالعمر عنّا بسّ أمنيّه

تا ينمحى ذكرنا تمنّينا

*   *   *   *  *

سيفي الكلمه وبحسب علمي

استعملت سيفي ضدّك الكلمه

تا غيّرك وتحقّقي حلمي

ونرجع نعيش بجوّنا السلمي

مع بعضنا كلّ ما تلاقينا

*   *   *   *  *